الاثنين، 30 مارس 2009

وادى حوف



مش فاكر من كام اسبوع كدة كنت رايح القاهرة علشان اشوف خطيبتى..... فانا بروح الخميس بليل أقعد فى وادى حوف فى حلوان اجمد... حتة فى القاهرة صحرا وبعدين فاضية و كل البيوت الى فيها متعديش اربع خمس ادوار اللهم من كام عمارة .....و الشارع فى شجر على الجنبين و تحس انك فى الثلاثينات كدة... كل ربع ساعة عربية تعدى و الجو عشرى كدة كان الواحد قاعد فى براحتة .......












و يا سلام بقى و انت قاعد بليل و تبقى سامع صوت الكهرباء و هى ماشية فى الكابلات اصلا الشارع اسمة شارع الكابلات

و علشان اروح وادى حوف بركب المتر
و 22 محطة علشان اوصل المهم نزلت عند محطة مترو احمد عرابى و انا نازل على السلالم لقيت الأعلان دة
الواحد لما بيشوف حاجة زى دية مبيعلقش معروف اية بيتقال ....بس الى نفسى اعرفة الى عامل الأعلان دة دماغة فيها اية هو ولية الناس حيتصلوا بية.... دة لو حد اتصل ...بس انا متأكد ان فى ناس اتصلت...المهم وانا رايح على البيت كل مرة اروح جايبلى كيسين اندومى واتنين هوهوز و علبة عصير و كل مرة بروح للراجل مبيكونش عندة هوهوز ويطلع على السلم يجبهالى المرة دى قولتلة لأ انا كل مرة اجى من اسكندرية مخصوص علشان اطلعك فوق المهم اتصحبت على الراجل و اخدت الحاجة وطلعت الشقة بفتح الباب لقيت و صل الكهرباء دة

الأستهلاك ب15قرش و المطلوب سدادة خمسة جنية و خمستاشر قرش و الخمسة دية نضافة يعنى استهلك ب 15 قرش و ادفع خمسة جنية نضافة مع انى مش موجود اصلا بأمارة ال15 قرش المهم......افتكرت ان القطة الى بلاقيها علطول على السلم كانت حامل المرة الى فاتت و لقيتها خلفت و دخلت واحد من عيالها كدة متشرد كدة و قعد معايا واكل اندومى و شرب عصير لبن بالشوكلاتة واكل هوهوز هاص يوميها حلاوة القط انا سميتة حلاوة ....
نمت صحيت على صوت الراجل الى فى الشقة الى جنبى الراجل صوتة اييييية مرعب كات بيزعق لعيالة مش عارف علشان اية..... بتخض كل ما بيتكلم و بعدين بقى الشقة كلها على بعضها 65 متر الواحد مبيكسلش خالص فيها كل حاجة جنب كل حاجة ....خطوتين لقدام بقيت فى الصالة خطوة يمين بقيت فى المطبخ خطوة لورا +يمين بقيت فى الحمام خطوتين يمين +لورا بقيت فى الغرفة بس مشكلها ان حيطانها رصاصى و بلاط و الطربيزة الى فى الصالة او الى هى بردة السفرة حديد كدة و رصاصى بردة تحس انك مخطوف او فى سجن بس بردة بحبها البوست دة انا كاتبة علشان اقول انا بحب وادى حوف وانى لازم ادفع خمسة جنية و خمستاشر قرش لمصلحة الكهرباء