الأربعاء، 26 أغسطس 2009

يوسف(دعائى)



(بسم الله الرحمن الرحيم)


فَاطِرَ السَّمَوَاتِ وَالأَرْضِ أَنْتَ وَلِيِّ فِي الدُّنْيَا وَالآخِرَةِ تَوَفَّنِي مُسْلِماً وَأَلْحِقْنِي بِالصَّالِحِينَ


(سورة يوسف)


الثلاثاء، 25 أغسطس 2009

خواطر


ساعات بقعد أفكر مع نفسي هو أنا حيجى في يوم من الأيام مثلا و ابقي زى الناس المشهورة الى سايبة اثر في المكان الى هي فيه حبقى مثلا زى الناس الى كل شوية تشوفهم ويحكوا عن ذكريات زمان ويقولوا دة أنا ياما سفيت التراب واشتغلت بتاع جرايد و كنت بمسح عربيات و في الأخر تكتشف انك قاعد قدام صاحب اكبر شركة دعاية و إعلان مثلا في الشرق الأوسط....أو مثلا حيجى يوم ألاقى أنهم طالبني أنى اعمل محاضرة في المكتبة بصفتي احد المحركين الأقتصادين الأساسين في البلد عشان أفيد الناس بخبرتي ....

وساعات كمان بفكر أزاي أنا لحد دلوقتى مطلعتش بره مصر أزاى مثلا مروحتش ولا مشيت في غابة قبل كده أزاي مشفتش شلالات نياجرا ولا وقفت عندها قبل كده وازاى مطلعتش وقفت فوق اعلي مكان في الأرض ولا عشت تجربة أنى أتسلق جبل من قبل ......ازاى لحد دلوقتى عمري ما مشيت في الثلج و لا سكنت في كوخ و حوليا شجر بس متغطي بتلج ...ازاى الدنيا فيها كل الحاجات دية و أنا في الأخر قاعد هنا عشان أنا لقيت نفسي هنا مش اكتر و عشان الساقية الى إحنا رابطين نفسنا بيها .......أو مثلا أجرب أنى اغطس في البحر وأشوف الكائنات الى عايشه تحت البحر وفاكرة يا عيني إن هي دية كل الدنيا ....أو اركب مركب كبيرة و أجرب أروح انتركاتيكا وأشوف يعنى أية الدنيا تفضل منورة 6 شهور و تضلم 6 شهور ....

مش عايز لما أموت محدش يحس بيا أو أكون زى ما جيت الدنيا زى ما روحت منها .....عايز اعلم على الدنيا عايز يكون لي لزمة .

كلمة من القلب

سيناريو : د. أحمد خالد توفيق
رسوم :فواز












الاثنين، 24 أغسطس 2009

اسمى



نزلة معوية حادة

  • هو أنا أكلت أية بره مش فاكر تكونش المرة الوحيدة الى قررت أكل فيها من عند روماريو دة و كنت جعان فأكلت من عنده
  • سخونة و ترجيع و تكسير في الجسم و درجة حرارة 39
  • أصل أنا كل م اشرب مياه أروح مرجعها تانى وأقول يادى النيلة طب حصوم ازاى الأكل مش مهم إنما المياه حعمل أية
  • نايم طول اليوم أول يوم رمضان مش قادر أتحرك و نفسي اشرب والله كنت حعيط عشان الراجل يأذن
  • كل واحد يدخل الغرفة ياخد حاجة من سكات و يطلع تانى و أنا عمال أقول هو أنا مش باين ولا أية
  • كل واحد يدخل يزعقلى و يقولى انزل اشترى اطلع شوف عمال روح هات مش عارف أية وأنا أقول والله تعبان مش قادر
  • مصدقوش غير لما روحت المستشفى واخدت 3 حقن في المتين وعملت التحاليل ساعتها قالولى دة أنت شكلك عيان بجد
  • لما عرفوا أنى عيان كلهم بيحبونى وقلقانين و خايفين علية أنا عايز كده علطول
  • دلوقتى أنا أحسن شوية الحمد لله بس هو الى في الصورة دة لسه موجود هو و المغص
  • مش مهم تقولوا أية يالى حتقروا عشان أصلا البلوج دة ليا أنا وزى منا قولت من 2 بوست فاتو

الخميس، 20 أغسطس 2009

أنا حر



الأربعاء، 19 أغسطس 2009

طز فى الناس


ايوة انا الى عامل الصورة دية
ايوة انا الى كاتب فيها طز فى الناس
ايوة انا زهقان من الناس
ايوة زهقان من الناس الى بيعملوا للناس حساب اكبر من حجمهم
ايوة زهقان من الناس الى هنا بحاجتها الهبلة الى لا بتقدم و لا بتأخر
ايوة زهقت من الناس بتوع كدة و خلاص دول
ايوة زهقت من الناس الى حافظة مش فاهمة
وياريتهم بيريحوا بالى بيعملوة لا و مش مبسوطين فى الأخر
ياخى ...الناس

الثلاثاء، 18 أغسطس 2009

رمضان..... انت جيت يا رمضان


ما الجديد في رمضان هذا العام؟.. ما الذي سيشاهده الصائمون وقد جلسوا أمام أجهزة التليفزيون متخمين، «حيرانين» يلهثون من برنامج إلى مسلسل إلى مسابقة؟ في كل عام يأتي شهر اسمه «رمضان»، وفى كل عام نراهن على حصان اسمه «التليفزيون»، وفى كل عام نخسرهذا العام - كغيره - سنلهث وراء ما يقرب من ٤٠ مسلسلاً تكلفتها نحو ٧٠٠ مليون جنيه.
أنا لست ضد التلفزيون ولا ضد ما يحدث فأنا أؤمن بالحرية و كل شخص مسئول عما يفعله و لكنى ضد الغباء و ضد الأفعال الغير مبررة التي لو بحثت في أصلها ستجد أن الطبيعي وما يحدث الآن عكس تماما ما يجب أن نفعله ولن أقول من النواحي الكثيرة ولكن على الأقل منطقيا هذا خطاء ويدل على الغباء.
وبعدين فين المنطق في الى بيحصل أنا الى اعرفه إن رمضان موجود من قبل التلفزيون و الخيم و الهجص دة.... و بعدين رمضان بيجى مرة واحدة في السنة إنما التلفزيون موجود كل سنة طيب فين المنطق بقى إن المنتجين و الممثلين و كل العالم دية يحوشوا كل حاجة لرمضان عشان ينزلوا بيها أنا الى اعرفه إننا لو كنا في زمن المنطق إن المنتج من دول يقول أية رمضان جى و بقى على الأبواب يبقى إحنا نريح الشهر دة و اهو يبقى أجازة ونحاول نتوب فيه و بعدين قدامنا السنة كلها نعمل فيها مسلسلات ونقول إننا بنعمل أل يعنى أعمال هادفة و من صميم المجتمع وكمان بتوع الخيام الرمضانية .....
التفكير المنطقي بيقول إن الناس المفروض الروحانيات عندها بتعلى في رمضان .......فالمفروض حيقولوا لا يا عم خيم مين دانتا حتلاقى الناس في الجوامع طول اليل و بيصلوا أصلة شهر يتيم و ما بيصدقوا أنة يجى عشان يكفروا عن الى عملوة و بعديها ننزل إحنا بالهشتك بشتك وشيشتنا و حشيشنا براحتنا .........صباح كمية المعلومات الدينية الى نعرفها عن رمضان و أهمية رمضان عند ربنا و العروض الى ربنا عملها لنا في رمضان عشان نستغلها عروض كتير أوى و في المقابل بيطلع في رمضان حاجات غلط كتير أوى تضيع علينا العروض الربانية.....
و700 مليون جنية صرفوها على حاجات خايبة ....أنا مش بقول عليها خايبة عشان أنا مثلا ضد التمثيل و الكلام دة لا يا عم اصرف و مثل و اعمل كل الى في نفسك بس أنا مستخسر الفلوس دية فى الهبل دة هما بيفتكروا نفسهم بيعملوا حاجة ذات قيمة أو عارفين إن هما بيعملوا حاجات عبيطة بس كل بيودي في الأخر أنهم بياكلوا عيش أنا مش بعمم بس بقول اغلب الناس و اغلب الحاجات بقت بتعكس مدى تفاهة و عته و غباء الناس
الخلاصة أنى اعتقد إن رمضان أهم من هذه الترهات وفي رمضان تزكية للنفس وقرب من الله ،فيه أيضا تغلق أبواب النار وتصفد الشياطين وتفتح أبواب الرحمة لذلك اعتقد أنة يجب تقديم و تفضيل شهر رمضان قبل كل هذه الأشياء التي لا أجد سببا واحد يجعل هؤلاء الناس ينتظرون حتى يأتي هذا الشهر الفضيل ويفتحوا الباب على مصراعيه ليوحدوا لنا كل ما يشغلنا عن استغلال هذا الشعر


هذة ليلتى




الخميس، 13 أغسطس 2009

قصر البارون إمبان

قصر البارون إمبان، قصر أثري بالغ الروعة والجمال يقع في قلب منطقة مصر الجديدة بالقاهرة بجمهورية مصر العربية وفي شارع العروبة تحديداً على الطريق الرئيسي المؤدي إلى مطار القاهرة الدولي ويشرف القصر على شارع العروبة وابن بطوطة وابن جبير وحسن صادق· صممه المعماري الفرنسي Alexandre Marcel ألكساندر مارسيل (1860 - 1928) وزخرفه Georges-Louis Claude جورج لويس كلود (1879 - 1963 ) واكتمل البناء عام 1911 شيده المليونير البلجيكي البارون ادوارد إمبان (20 سبتمبر 1852 - 22 يوليو 1929)، والذي جاء إلى مصر من الهند في نهاية القرن التاسع عشر بعد قليل من افتتاح قناة السويس،

حيث بقى في مصر واختار مكاناً صحراوياً (في ذلك الوقت) لبناء قصره في وسط ضاحية مصر الجديدة التي أنشأنها بالقرب من القاهرة العاصمة والسويس كذلك، فوقع اختياره على تصميم مهندس فرنسي يدعى ألكسندر مارسيل الذي كان يعرض تصميم لقصر يتبنى الطرازين الأوروبي والهندي في معرض هندسي في باريس عام 1905 حيث أعجب به البارون واشتراه ليكون من أولى البنايات التي زينت لصحراء مصر الجديدة في عام 1911.

حيث جمع في تصميمه بين أسلوبين معماريين أحدهما ينتمي إلى قصر عصر النهضة خاصة بالنسبة للتماثيل الخارجية وسور القصر، أما القصر نفسه فينتمي إلى الطراز الكمبودي بقبته الطويل المحلاة بتماثيل بوذا، وقد جلب رخام القصر من إيطاليا والكريستال من تشيكوسلوفاكيا ويشغل القصر وحديقته الواسعة مساحة 12,500 ألف متر وانتهى بناء القصر للعالم عام 1911.


تحفة معمارية فريدة من نوعها على اعتبار أنه القصر الوحيد في العالم الذي لاتغيب عنه الشمس طوال النهار، وتم ذلك بتشييد قاعدته الخرسانية على رولمان بيلي تدور على عجلات بحيث يلف القصر بمن فيه (كل ساعة) ليرى الواقف في شرفته كل ما يدور حوله ويتبع الشمس في دورانها على مدار ساعات النهار.زود القصر بالخدم والحشم وابتدأت فيه حفلات السهر والسمر وارتاده رواد المجتمع الذين كانوا محور حفلاته حتى وفاة البارون في بلجيكا سنة 1929 بمرض السرطان.

إفتتاح القصر

في يوم افتتاح القصر دعا البارون إمبان السلطان حسين كامل الذي انبهر عندما صعد إلى البرج ولم يصدق عينيه، فالقاهرة كلها أمامه، ورأى السلطان حسين أهرامات الجيزة من مكانه من فوق البرج.

وتملكت الغيرة من قلب سلطان مصر ورفض أن يكون في عاصمة ملكه ماهو أعلي وأجمل من قصره فأوحى للبارون أن يهدي القصر إليه ولكنه اعتذر في أدب جم فخرج السطان غاضبا ولم يجد البارون إمبان أمامه حلا سوي بناء قصر آخر مجاور لقصره وأهدائه لسلطان البلاد. ونفذ البارن إمبان الفكرة وبني قصرا ثانيا في زمن قياسي وأهداه للسلطان حسين كامل ولكن السلطان رفض الهدية وأصر علي أهدائه القصر الأصلي واعتبر إمبان خارجا علي طاعته، وأمام غضبة السلطان حزم البارون حقائبه وغادر مصر حتي تهدأ الأمور.

بعد شهور قليلة تبدلت الأوضاع في مصر، وعاد البارون إمبان من جديد إلى مصر ثم كانت الفكرة التي طرأت على ذهن البارون وهو الاقتصادي الفذ، وهي إنشاء شركة واحة هليوبوليس التي أنشأ من خلالها ضاحية مصر الجديدة والتي أراد من خلالها إقامة مجتمع من المساكن للطبقة الأرستقراطية والجاليات الأجنبية خاصة البلجيكيين المقيمين بالقاهرة.

منقول من ويكيبيديا، الموسوعة الحرة



الأربعاء، 12 أغسطس 2009

أحنا السبب.....أمال مين يعنى

أنا بدأت اشك في الى بيحصل وفى نفسي ....أية كمية الأعتصامات الى بتحصل دية و كمية الوقفات الاحتجاجية وإضرابات من عمال لدكاترة لموظفين لطلاب لمواطنين و لكل الأسباب .....وكمان مع نظرية المؤامرة التي يؤمن بها المواطن المصري وانعدام الثقة في الحكومة فبتزيد إحساس المؤامرة لدى المواطن المصري .....فأنا بقالي حبة بفكر هو دة ليه لزمة ولا مالوش يعنى ....الى بنعملة دة صح ولا الناس بتهرتل على أساس إن هي بقت مودة وهما مش فاهمين الموقف صح أو مش فاهمين يعنى أية إضراب و اعتصام .....بصراحة مش عارف و بقيت متلخبط مين الصح و مين الغلط.....من كام يوم مروان صديقي رجع من فرنسا في الأجازة السنوية بتاعتة مروان في الأجازة الى فاتت و هو ماشى اشترى علم مصر عشان بتوحشه و بيقولى متتخيلش لما بتمشى هناك و تلاقى المسلة المصرية وفوقيها مثلث دهب بتحس أد أية بالفخر وكمان بيقولى لما يكون المنتخب بيلعب ماتش و يكسب متتخيلش المصريين هناك بيحسوا أد أية بالفخر و بيحس أنة أحسن الناس مع أنها كوره يعنى بس اهو اى حاجة عدله تيجى من مصر ......
بس لما جة الأجازة دية مكنش مبسوط بنكلة وفضلنا نتكلم عن الموضوع الأبدي إن الناس أتغيرت و مفيش و مفيش ومفيش بس الكلمة الى قالها هي دية الى كنت بدور عليها من زمان و مش عارف ألاقيها بيقولى الناس خلاص هنا مبقاش عندها منطق في التفكير و لا التعامل بيقولى مش حقولك إن بره الدنيا أحسن ولا ان مفيش مشاكل بس المشاكل الى هناك مشاكل ناس عايشه مش بتحاول تعيش ....مشاكل تانية بعد الى إحنا فيها إنما هنا الحياة بقت صعبة ....وقرر مروان أنة بقى صعب أنة يرجع تانى و يعيش علطول في مصر .....اتارى إننا بقينا عاملين زى الى عايشين فى بيت مهجور مفيش كهرباء و لا مياه ولا غاز و السقف بتاع البيت مكسر و مخرم من كل حتة ولما الدنيا بتمطر بتمطر على دماغك وأنت جوه البيت ....بس لو حد سئلك انت عايش فين.. حتقلة عنوان بيتك المخرم واهو اسمك في الأخر عايش في بيت .......بس مش هي دية العيشة
مش هي دية العيشة انك تحاول البقاء على قيد الحياة و عدم الغرق ..... بعدين قولت طب العيب في مين طلع إن العيب مش في مصر...... مصر مالها هى عملت الى عليها ومكانها طلع في نص الأرض عايز مياه عشان تزرع و تبقى دولة زراعية عندك النيل بحالة أطول نهر في العالم ..... عايز بحر عشان تجارة عندك أتنين واحد ناحية أوروبا و التانى ناحية أسيا و عندك قناة السويس عايز صحراء فيها غاز و بترول و موارد طبيعية.. تبنى فيها مصانع و تستصلحها وتعمل مشروعات فيها عندك أتنين شرقية و غربية ...عايز أية تانى عايز عايز تنشط السياحة و تبقى بلد سياحي كل الى فات دة يخليك من اكبر البلاد السياحية غير كده ثلث أثار العالم موجودة عندك .....عايز ناس تشغل كل الكلام الى فات دة بسم الله ما شاء الله عندك اكبر ثروة بشرية في المنطقة ....
أمال ليه إحنا عاملين كده غير إن العيب يكون مننا إحنا وإننا إحنا الى مش عارفين نستغل كل الثروات الى عندنا دية .....أكيد العيب مش من مصر و إن إحنا إلى بوظناها أمال الناس كلها طول عمرها و لحد دلوقتى طامعنين في مصر ليه ."...عبط مثلا


الأربعاء، 5 أغسطس 2009

تفاصيل قديمة فاضلة1

الساعة 6 الصبح جاب الكرسي الخشب القديم ويحطة عند سور البلكونة عشان يعرف ينط في الجنينة ويجرى بسرعة وهو لابس الشورت الأصفر بتاعة الصغير و التي شيرت المخططة بالعرض ازرق في ابيض عشان يلحق يروح عند عم السيد عشان يتفرج عليهم و هما بيحلبوا الجاموسة...... وهو عمال يتفرج عليهم جة في دماغه واستغرب هي بتجيب اللبن دة كله منين وفين عيالها عشان يشربوا اللبن و مش بيزعلوا عشان إحنا بناخد أكلهم ....وينسى الكلام دة كله بسرعة ويرجع جرى على البيت ويدخل تانى بنفس الطريقة الى خرج بيها ويلاقى مامتة صاحية يحكيلها هو شاف أية إل يعنى كده بياكلها في الكلام عشان متقولش حاجة على الى عملة الصبح ....وهى مامتة عارفة كل حاجة بس مطنشة بمزاجها وهو فاكر أنة حويط و زكى .....شرب اللبن وكان لما يشربة.... من كتر ما هو تقيل كان يا عيني بيدوخ .....وبعدين يقول للأبوة أنا حاروح الغيط مع الجوهري وحركب الحمار والعب .....وقبل ما يسمع الرد يكون جرى ويركب الحمار ويسوق هو ويركب الجوهرة وراة ........
وفى السكة و هما رايحين شاف كلب صغير عايز يطلع و مش عارف وهو والجوهري يعملوا حوارات عشان يطلعوا الكلب....وكان حاسس أنة بيعمل حاجة جامدة وطلعوا الكلب وخدوة حطوه في الزريبة وحطولوا لبن وقفلوا الباب و مشيوا...و يسيب الجوهري ويطلع يلعب مع الحمار ويقول للجوهري أنا رايح عند هيثم بن العمدة ويجرى وراة الجوهري لحد ما يوصل لبيت العمدة وهيثم يطلع ويلاقيهم عاملين سمك مقلي صغير كده لسه كانوا مصطادينة من الترعة الكبيرة ويقعد معاهم وياكل سمك صغير وهو في قمة الفرحة وحاسس أنة بيعمل أحلى حاجة في الدنيا وطول ما هما قاعدين يعزموا علية و النبي لاتاكل وهو يقول خلاص كده التلاجة قفلت مفيش مكان ودايما يأما كانوا يقلولة البية الصغير ا والى مش عارفينة أوى يقلولة يا عسل .....وبعد السمك طلع هو و هيثم يتمشوا ناحية ارض العنب...ويجى ينط القناية ميعرفش ويتكعبل ورجلة تقع في مية القناية .... ويقول أنا كده خلاص جاتلى بلهارسيا ويكتم في نفسه و ميقولش لحد لحسن يحصل حاجة ....وعقبال ما غسل رجلة في الطرمبة و كان بردة مش عارف هي المية دية بتيجى منين نسى موضوع البلهارسيا وفضل هو وهيثم و الجوهري يشوفوا مين حيمسك اكبر عدد من الدبابير بتاعة العنب وكان على كل دبور باباه يديلوا ربع جنية ......
وبعدين الجوهري قال أنا رايح الرحمانية أجيب الترانزستور ...راح باصلة كده وقاله رايح بالحمار ولا على رجلك يقوله حركب الحمار يروح قايلة أنا معاك ويروحوا الرحمانية ويعمل نفسه فتك ويقول أنا حروح لوحدى مش عايز منك حاجة مدام أنت مش عايزنى أسوق الحمار....... وينزل ويسب الجوهري و الحمار و يقول أنا حروح لوحدى و الدنيا تليل علية ويجيلة إحساس أنة ضايع لا محالة والدنيا كبرت ويعيط وبينة و بين نفسه يقول أجمد ياض أنت عندك 6 سنين ويقول أنا أحسن حاجة أنا ارجع من مكان ماجيت بس أوصلة ازاى من مكان ماجيت دة......
وتيجى النجدة ويلاقى اخو الجوهري الكبير إبراهيم جى وانقذة من الى كان فيه وهو عمال يقول في سره وحياة امى بس أما أشوفك يا جوهري حفضل أعض فيك و مش حسيبك مع أنة هو الى سابه ونزل وقال حيروح لوحدة ويروح البيت عمال يفكر في الكلام الى حيقولة لباباة و مامتة يدخل يلاقى امة بتعيط وتروح واخداة في حضنها وأبوة بيبصلة ويضحك .....ويقول هو لنفسه هما مش حيضربونى ولا أية وتاخدة مامتة عشان يستحمى ويغير الشورت الى مبقاش اصفر الصغير ويرجع من تانى شكله ابن ناس .........
ويدخل ينام هو وأخوة ويحكيلة في الضلمة وهما قاعدين نايمين على السرير عن المغامرات الى عملها النهاردة وأخوة يحكيلة عمل أية لما نزل مع باباه الأرض وازاى كانوا بيسقوا الأرض ويتفقوا أنهم يصحوا بدري وينطو من على الكرسي الخشب القديم