من أسبوعين كده كنت قاعد مع واحد صاحبي و قاعدين كالعادة بنتكلم عن الدنيا و الحال و الأحوال و العيشة والى عيشنها المهم صاحبي دة كان قاعد و لابس وش بلاستيك ....أية يا عم مالك قرفان ليه و زهقان قالي هاتلى سيجارة اشد فيها بدل م اشد في شعري من العيشة الهباب الى إحنا عايشنها .....فقلتلة ليه يا عم بس ماهى ماشية و الحمد لله (أنا كنت ساعتها واخد قرار من فترة أنى أنا الى بحكم نفسي مش نفسي الى بتحكمنى واني عندي حاجات كتير تخليني مبسوط اكتر من أنى أكون متنكد)المهم لقيتة بيقولى يا عم أنا من ساعة ما الموبيل بتاعى أتسرق عايز أجيب موبايل تانى و مش عارف عايزلى يتاع 1.200 جنية فوق الى معايا عشان أجيب الموبايل وبعدين كمان عايز أغير العربية أنا بعت العربية الى معايا و لسه مش عارف حاجيب العربية ازاى و أكمل فلوسها ازاى ؟.....فبقولة ليه أنت معاك كام ...قالي معاية 50.000 جنية و أبويا قالي حيديني 25.000 جنية بس دول بردة ميكفوش عشان العربية الى أنا عايزها عاملة 95.000 جنية دى عيشة تزهق حتى الموبايل ولا العربية الواحد مش عارف يغيرهم و أبويا دة غاوي يرخم عليا و خلاص أنا زهقت من الراجل دة .....وكمان أنا عايز أتجوز....أنا بقى قاعد بسمع كل دة و عمال أقول في نفسي اة يابن الهايفة هي دية مشاكلك ...آمال أنا أقول أية أنا الى بتجوز و بجهز نفسي و الشقة و الشبكة و المهر و الهجص دة كله وفى نفس الوقت و أنا بفكر في الحجات دية قولت أكيد بردة في ناس تانية شايفين إن الحجات اللي أنا شايفها مشاكل كبيرو بالنسبالى أكيد بالنسبالهم يقولوا أية الهيافة الى هو فيها دية مش كفاية أنة قادر أنة يفكر يتجوز ولا أنة عنده أب جابلة الشقة .....رحت طالع من سرحاني دة و لقيتة لسه عمال يشكى ويقولى أنا عايز أتجوز تقوله ليه يا عم يقولك آهة كده الموضوع زى مابروح الحمام و أكل و اشرب آهة الجواز كده ....وهوب رحت طالع فيه قولتلة يا عم أنت أنت واخد بالك أنت بتقول أية أنت واحد ببقول أنة عايز يجيب موبايل و انك عايز تجيب عربية و أبوك حيكملك على فلوسها و مخنوق من أبوك عشان بيوديك المصنع بتاعكو إلى في برج العرب ....أية يا عم كل دة مش عجبك متقول الحمد لله على الى أنت فيه ...........مش كان ربنا قادر يخليك قاعد نفس القعدة دية بس و أنت عمال تشكى من أمك عايزة تعمل عملية مثلا و أنت مش عارف تتصرف و أبوك سايبلكو البيت و مش موجود و أخوك مثلا مدمن ومطلع عنكو .....أو يا عم كان ممكن تبقى بتلات صوابع يا عم احمد ربك إننا عندنا حتة بنام فيها انك بتعرف تفتح عنيك و تقفلها انك الحمد لله ربنا خلقك في أحسن تقويم و مطلعتش مثلا عندك عته مغولي ....المهم قالي أنا معاك في كل دة و أنا بقول الحمد لله بس يعنى الواحد بيقول كده فضفضة ....قولتلة اة يبقى بلاش و ش الكلب الى أنت لابسة من ساعة ما جيت و قول إنشاء الله وبس ..........المهم تانى يوم وأنا في الشغل لقيت نمرة غريبة بترن اتارى الواد جاب التليفون الى هو عايزة فبسئلة أية الى حصل قالي لما روحت من عندك أمبارح لقيت امى مطالعالى فلوس و بتقولي خد كمل على الى معاك و هات التليفون وابقي هات الفلوس في اى وقت .....قلتلة شفت يا قلة لو صبر القاتل على المقتول كان مات لوحدة المهم بعد ما قفل معايا اتبعتلى ميل من زمايلى في الشغل فيه فيديو عن أم إبراهيم .... أم إبراهيم دية للي ميعرفهاش و حدة ست عجوز جدا عايشه في غرفة لوحدها و كمان ضريرة ومحدش معاها .... يا جماعه الست بتاخد 60 جنيه في الشهر و بتحمد ربنا....وعمرو الليثى يقولها مش عايزة حاجة اى حاجة اعملهالك تقوله شكرا دة الستين جنية بيفيضوا منى ومفيش على لسانها غير الحمد لله و عمالة تدعى للرسول ولدينه وتقول الحمد لله الى معاهم فلوس كتير دول و حشين و بتتكلم بصدق و إيمان تام بالى بتقوله ....مدعتش على الحكومة ولا قالت يدونى معاش و لا دعت على عيالها أنهم سايبنها لا دول صعبانين عليها كمان ولا قعدت تقول أنا عيانة و مرضانة و تشكى و تتوجع و تتمسكن ولو كانت عملت كده كان حبيقى حقها بردة .......واتفرجت على الفيديو ودية كانت أول مرة في حياتي أتفرج على حاجة و تخليني اعيط كنت دايما بستغرب من الناس الى بتعيط علطول دية ......وبعد الفيديو قررت أنى اكتب البوست دة لحد الحتة دية بس انشغلت و نسيته مؤقتا ....بس النهاردة اتبعتلى على الميل فيديو بتاع عمرو الليثى(واحد من الناس) بيقول إن أم إبراهيم توفاها الله...................
أم إبراهيم غيرتني و خليتني أفكر بطريقة تانية
أم إبراهيم مكنتش أتصور إن في ناس كده زيها موجودة
أم إبراهيم ماتت يوم اثنين و هي بتصلى العصر قبل ما تستلم شقة واحد كان أتبرع بيها عشانها .
اللهم ارحم أم إبراهيم وارحم موتانا وموتي المسلمين أجمعين
اللهم ارزقنا القناعة والرضا
اللهم ارزقنا القناعة والرضا
اللهم ارزقنا القناعة والرضا
يا رب .. يا رب .. يا رب
http://www.youtube.com/watch?v=ouuF37kPork
الفيديو بتاع أم إبراهيم رحمها الله
