skip to main |
skip to sidebar
لسة بردة عمال اشوف حاجات تفقع و تغيظ فى المحروسة ....زى موضوع العيدية دة المعروف ان العيدية الأبهات و الجدود بيدوها لأطفال العيلة فى العيد علشان يفرحوا ويهيصوا بس اكتشفت ان الموضوع مبقاش مقتصر على الأطفال بس انهم ياخدوا عدية ولا على الأبهات و الجدود انهم يدو عدية لالالالا دة ناس كتير اوى بتاخد عدية و ياريت فى العيد بس لا دى السنة كلها عندهم عيد خد عندك مثلا رايح السينما ورحت عند شباك التذاكر تقطع تذكرتين زى خلق اللة تلاقى الراجل الى قاعد فى شباك التذاكر حاطط قدامة جنيهات و انصص ويقوللك كل سنة وانت طيب تفضل تفكر انت هو اية المناسبة متفتكرش يمكن ان انت روحت السينما و شفوك دة عيد عندهم وتلاقية بيضحكللك فتقولو وانت طيب وتروح مديلة حاجة انت و ذوقك بقى تيجى تخش علشان تتفرج على الفيلم الراجل ابو كشاف الى بيقعد الناس تلاقية بيقوللك كل سنة وانت طيب يا باشا بردة متفتكرش انهم مبسوطين بيك وتلاقية باصصلك كدة لحد متديلة هو كمان جنية ولا حاجة علشان يديللك التذاكر و تقعد المهم تيجى الأستراحة وتكون عايز تلبى نداء الطبيعة فتدخل الحمام وانت طالع تلاقى واحد واقف و بيديللك منديل و يقوللك كل سنة وانت طيب تروح مطلع تانى الى فية النصيب و تديهولة (اهو دة بقى الى الدكتور احمد خالد توفيق بيقول علية عندما يصبح التبول مهنة فى مصر)....المهم خلصت الفيلم و طالع بقى تركب العربية الى انت اصلا ركنها فى الشارع تلاقى واحد متعرفش طلع منين ويجى يشبر زجاج العربية مينضفوش ويقوللك خوش علية يا بية ايوة كدة هات بقى عجلة يمين واطلع...يا فلاحتك تحس انك من غيرة مكنتش حتعرف تطلع بالعربيةوحتبات فى الشارع ويجى يقوللك بردة كل سنة وانت طيب يا بية وبردة تديلة الى فية النصيب ....تعالو بس الأول نكلم على الناس الى فاتو دول و بعدين نكمل هو الراجل الى قاعد فى شباك التذاكر دة ولا الى بيقعد الناس فى السنيما مش دية شغلتة وبياخد مرتب عليها و اصلا انا دافع تمن السينما بالخدمات بضريبة الملاهى و الضريبة على اساس اية ياخد فلوس زيادة ....والى واقف على باب الحمام مبيعملش حاجة غير انة يديللك منديل ملوش لازمة اية بيطلب فلوس على اساس اية متفهمش بردة نفس الحال مع الراجل الى عامل نفسة سايس وقال اية بيطلعنى بالعربية ...الواحد يعرف مثلا انة يقول واللة دة غلبان و شقيان لما الواحد يساعدة بحاجة بس بمزاج الواحد مش تلاقية بصلك كدة و مستنى غصبعنك لا وكمان بيتشرط ربع جنية لأ نص جنية او جنية (وانت بتعمل اية اصلا علشان اديك الفلوس دية ).....المهم تسيب العالم دية و تيجى تجيب كارت للموبايل تسمع اسعار متفاوتة اللى تلاقية عندة ضمير وبيبيعو بنفس السعر الى الشركة منزلاة بية والى تلاقية مزود نص جنية او جنية و يا سلام مثلا لو انت فى الرست وانت جى من السفر تلاقى الحاجة الضعف
تركب تاكسى تسمع رقم عبيط فى مسافة متستهلش انا مش فاهم هى لية الحكومة مش عايزة ترجع العداد السواق ياخد حقة و الراكب برضة و محدش يظلم التانى اهو السواق الى سايق دة كلة بيطلع علية لما بيغلى البونديرة يروح امين شرطة ظارفة مخالفة من الهوا و يدفعلة تلاتين اربعين جنية عدية طبعا علشان يشلهالة حتى لو بتقضى
مصلحة من حكومة برضة حتدفع عدية لو ركبت ميكروباص حتلاقى كل سواق بيقول اجرة على كيفة لو بتجيب سجاير حتلاقى كل واحد بيبعها بسعر المشكلة مش فى النص جنية ولا الجنية الى بتدفعة من غير متعرف لية او بتقول لنفسك يا عم اشترى دماغك.
المشكلةان الناس دول دة بقى ا اسلوب حياة عند هم بقت بتستسهل الفلوس و اكل العيش مش ملاحظين ان الناس دول كترو ومش ملاحظين ان كمية المتسولين فى مصر كترت وان كل حاجة علشان تعملها بقت محتاجة عدية
دى بقت حاجة تفقع و تغيظ بجد
