هي : أنا أمراه حرة في مجتمع اعطانى حريتي و بعدين شخصيتي كرامتي ذاتي أنت عايز تلغيني ولا أية
هو:طظظظظظظظظظظظظظظظظ كبيرة
همم حرية المرأة أنا رأى أنة من ساعة ما فضلوا يقولوا على موضوع حرية المرأة و الدنيا باظت و المرأة باظت و ازدادت غباء
ما الناس كانت عايشه قبل الموضوع دة و ماكنش فيه كل المشاكل الى موجودة دلوقتى و كل شوية نقول يا ريت زمان يرجع تانى
حرية أية و بتاع أية م كلنا مخاليق ربنا و عايشين فى الأرض وأنا لا طلبت و لا قولت أنا عايز أتولد راجل و أنتى قولتى أنا عايزة أتولد ست ....هو ربنا سبحانه و تعالى الى قدر دة .....وزى ما ربنا قدر أنة يبقى في راجل و ست قدر كمان أنة يبقى في اختلاف ما بين الراجل و الست وألا كان حيبقى أية لزمة نوعين.. كنا بقينا نوع واحد زى الأميبا كده و نتزاوج بالانقسام ...أنا رأى إن الى بتقول إن الست زى الراجل و مفيش فرق ما بينهم دة قمة الجهل و إن دية من الناس الى بتبقى حفظة شوية كلام معينين بيتقالوا في و قتهم
أنا رأى ان الحاجة الوحيدة الى الراجل و الست متشابهين فيها أنهم كائنات حية ....غير كده كل واحد عنده الخصائص بتاعتة و الى بيحصل دلوقتى إن الست مش عايزة تعمل مساوة لأ دول عايزين ياخدو مميزات الست و يجوروا على حق الرجالة ...الموضوع بالظبط عامل زى مثلا زى بطة و طلبة معاها ا ن هي حصان و مفيش فرق ما بيني و مابينة يا ستى يهديكى يرضيكى ...مفيش فايدة ....يا بطة أكيد في حكمة من إن ربنا خلقك بطة...بردة مفيش فايدة ..و راحت البطة عملت نفسها حصان بس منفعش عشان ببساطة هي بطة مش حصان ....بس دة مش معناه إن البط و حش لأ يا جدعان البط دة أحلى حاجة في الدنيا......أنا مع إن الست لازم تعامل معاملة كريمة و متحطش في موضع اقل من الراجل لأنها ببساطة بني ادم زية ....يعنى زى مانتا نفسك تنزل تخرج تتفسح و تشتغل و تعمل الى نفسك فيه طب ما هي كمان ملهاش نفس ولا أية زى مانتا بتبقى قاعد و طلبة معاك تولع سيجارة طب ما هي كمان ملهاش نفس ولا أية.... ماهو الجهاز التنفسي المجود عندك هو نفسه الى عندها و الدماغ هي هي .....طب أية بقى الاختلاف ما بين الراجل و الست ؟.....اعتقد إن الفرق ما بين الراجل و الست في الحاجات النفسية اكتر من الحاجات الظاهرة....يعنى نفسية الراجل غير نفسية الست و طريقة تفكير الراجل غير طريقة تفكير الست في حاجات بتبقى هي كده أمور مسلم بيها ...ليه عشان أنا راجل و انتى ست ...طب ليه بردة ...عشان هو كده ....عشان أنا معترضش انك انتى مثلا الى تحملي و تولدي و إن العيال يكونوا بيحبوكى هو ربنا عايز كده و عارف إن دية حاجات الراجل ميقدرش عليها و ميقدرش يستحملها الراجل مثلا معندوش طقاطان أنة يتعامل مع العيال بنفس الصبر و الحب الى الأم بتعامل بيه ابنها ...ليه مسمعناش إن الرجالة قفشه و نفسها تخلف و تربى ...عشان ببساطة دة دور الست مش دوري أنا ....لازم كل حاجة نجادل فيها و نلك و خلاص .......يعنى مينفعش تسمع كلام أهبل زى أشمعنا أنت ...اة في حاجات ممكن نقول فيها أشمعنا أنت و في حاجات مينفعش عشان أنا راجل مش تحكم و لا سيطرة و لا حاجة عشان دية صفات الذكر من الجنس البشرى زى كده الحيوانات الذكور ليهم صفات و الإناث ليهم صفات ....أنا ربنا خلقني كده خلق الذكر أنة يحب يبقى ليه في الأخر الكلمة الأخيرة و أنة يبقى ليه القيادة فى المكان الى هو فيه و يحب يحس إن الناس الى حوالية محتاجينة و أنة قادر على الحماية ...أمال مثلا ليه الأسد في الغابة لما حد يقرب من منطقة نفوذه بيتخانقوا لحد ما يقتل الدخيل ...مرحش قال لمراتة روحي انتى اتخانقى معاة محنا زى بعض لأ دة أنتا تلاقيه داخل بقلب جامد و بضرب و يطحن في الى قدامه و ممكن يموت بس بيكون مبسوط أنة دافع عن منطقته ودافع عن الجماعة بتاعتة ...ليه هو الى عمل كل دة عشان هو الذكر ...فحاسس إن دة واجبة وان دة الى المفروض .......... وزى ما الراجل بيبقى عنده الأحاسيس دية الأنثى بتبقى عايزة تحس إن هي ضعيفة (مش يعنى غلبانة أو كده)لأ ضعيفة و في حد محاوط عليها و عنده استعداد أنة يعمل اى حاجة عشانها و إن ليها ضهر تسند علية والراجل يبقى مبسوط أنة الضهر دة
مشاهد متشابهة:
· لو لاحظت مثلا في البني ادمين واحد عايز يظبط واحدة تلاقيه و أخدها كعب داير ورا البنت وهى تعمل نفسها أل مش و اخدة بالها و أل يعنى متضايقة و تفضل تشحتف فيه شوية و بعدين تحن علية و تكلمه (الكلام دة زمان طبعا إنما بعد حرية المرأة بقى يا عيني مفيش الهجص دة)
· لو لاحظت المشهد دة في الحيوانات (قطط,كلاب,......)تلاقى إن الموضوع مختلفش كتير عن المشهد السابق بتاع البنى أدمين نفس الكلام بردة ......طب ليه عشان الأنثى كده دية طبيعة فيها ملهاش دعوة بالعصر ولا أي حاجة...
زى مثلا تلاقى البنات ودية حاجة أنا متأكد أنهم حيوافقو عليها انك غالبيتهم الواحدة تيجى تسأل الراجل مالك...يرد يقول مفيش
يا عم الحاج مالك أحكى ...يرد يقول مفيش حاجة منا كويس آهة ....تقوم هي تسئلة تانى مالك.. قول... أحكى ..فضفض...يقول مفيش حاجة ..ماليش .انا زى الفل ...........تقوله خلاص اخبط دماغك في الحيطة أنت مش بتحبنى و مش عايز تحكيلى على حاجة و تفتكر أنة بيخبى عليها و أنهم مش قريبين من بعض و تحصل خناقة .....بس أصلا الموضوع ابسط من كده ......ببساطة لأن فيه فرق ما بين الراجل و الست هي بتبقى فاكره أنة لما يحكى على الى جواه حيستريح لأنها لما بتحكى بتستريح فهي فاكره أنة زيها لأ....أنا أفضل قاعد ساكت و كاتم و محكيش كده أنا بستريح و بعد فترة أول ما بيحس إن الموضوع بدء يخف شوية هو بيبقى عايز يحكى من نفسه مش لازم في و قتة .
يعنى أنت مثلا راجع من الشغل و صاحي من صباحية ربنا و بتتعامل مع ناس في الشارع و شغل و طالع عينك ....تقول أنا نفسي أروح أكل و أنام ...و تصحى يبقى نفسك تقعد مع نفسك شوية تعمل الى أنت بتحبة مع حالك مش عايز تسمع حواديت و لا تنزل ....ماشى معاك حق بس الى قاعدة في البيت من صباحية ربنا و مستنياك بقالها 11 ساعة عشان تكلم معاك و لا تنزل معاك ذنبها أية ....هي كمان معاها حق ....يبقى المهم التوقيت انك تيجى ساعات على نفسك عشان تبسطها و تعملها الى نفسها فيه و هي كمان تقدر كل الكلام دة و تقول م أسيبوا يعمل الى هو عايزة بردة المهم إن الحاجتين ميبقوش في نفس الوقت عشان متحصلش قفلة.
مشهد تانى :هي بتكلم صاحبتها عشان يتفقوا و ينزلوا يروحوا السينما ....و كانت مدة المكالمة 25 دقيقة (اقل واجب)
هي:أزيك
هى2:كويسة انتى عاملة و حشتينى
هي:وأنتي كمان
هى2:و أزيك و أزى طنط و سوسو و لولو و توتو و الواحد حمادة اخوكى عامل أية و نجح في الامتحانات و أية
هي:فكرتينى صحيح .......................
وتلاقيهم دخلوا في مواضيع كتير جانبية متعرفش أية لازمتها و بعد مرور ال25 دقيقة
هي:يا بت كفاية رغى عايزين نروح السينما الى جنب البيت
هى2:..........
فاتحة موضوع تانى والى كانت مستعجلة نسيت أصلا أنهم عايزين ينزلوا و تضيع عليهم السينما
.............واحد بيتصل بصاحبة عشان يروح السينما و استغرقت المكالمة 25 ثانية
هو:عامل أية
هو2:تمام أنت عامل أية
هو:تمام..... بقولك تيجى نروح السينما النهاردة ؟
هو2:و ماله معاك يا ريس ...حلبس وأعدي عليك
هو:قشطه...سلام
هو2:سلام
هو دة الفرق ما بين الراجل و الست و على فكرة ممكن تلاقى رجالة كده رغايين بس دية بتبقى عيوب في الراجل .بس دية من خصائص الستات .
خلاصة الكلام إن كل واحد و عنده الحاجات بتاعتة الى هو شايف أنها مهمة بالنسبالة مش مهم بقى أنت بالنسبالك مهمة ولا لأ المهم انك تحترم الحاجات دية عشان غيرك يحترم الحاجات الى بالنسبالك مهمة و بالنسبالة عبيطة و مهم كمان التوقيت بتاعة الحجات دية .
